El Conseyu de Seguridá de la Organización de les Naciones Xuníes (ONX) ta estudiando un borrador de resolución planteáu pol Reinu Xuníu pa condenar la ofensiva yihadista n’Irak y tratar de debilitala cortando les sos víes de financiación.

El textu plantea conxelar los activos financieros de varios llíderes del Estáu Islámicu (EI) y amenaza con sanciones a cualaquier persona ou organización que-y preste apoyu a la milia islámica. El borrador alvierte en concreto a los que recluten nuevos miembros pa l’EI al traviés d’internet y les redes sociales.

Amás, anima a los Gobiernos a proponer llistes de nomes con individuos y entidaes que consideren qu’apoyen a esi y otros grupos yihadistes pa la so inclusión urxente baxo’l réximen de sanciones de la ONX.

El textu tamién ordena a expertos de Naciones Xuníes la ellaboración nun plazu de 90 díes d’un oinforme sobre la amenaza que plantea l’EI, enantes conocíu como l’Estái Islámicu n’Irak y el Llevante o EIIL, y les sos fontes de financiación y d’armes, xunto a recomendaciones sobre cómo frenar el so avance.

El borrador británicu condena nos “términos más duros los actos terroristes del EI y la so ideoloxía violenta extremista, incluyendo los sos graves, sistemáticos y xeneralizaos abusos de los derechos humanos y violaciones de la llei humanitaria internacional”.

Nesti sentíu, recuerda que los ataques que ta llevando al acabu escontra la población civil con base nel so orixen étnicu, relixón o creencies constituyen un “cremen escontra la humanidá” que ten de ser persiguíu.

El Conseyu de Seguridá, que ya s’aconceyara esta selmana p’analizar los últimos acontecimientos n’Irak, podría votar la propuesta de resolución nos próximos díes.

Güei, el presidente de los Estaos Xuníos, Barack Obama, anunció l’éxitu de los primeros bombardeos selectivos escontra posiciones del EI nel norte d’Irak, pero reiteró la necesidá de cerar un gobiernu d’unidá nesi país qu’ataye’l problema.