Dende va años vien dándose una polémica sobre’l derechu a los pastos del puertu Pinos en Babia, propiedá del Conceyu de Mieres y que, agora, que sigue ensin resolvese, pon de manifiestu la persistencia d’una antigua sienda ganadera dende’l centru d’Asturies hacia los pastos lleoneses.

A primeros del sieglu XX, un alcalde mierense decidió proceder a la compra de los pastos que tovía agora, cásique cien años depués, siguen explotando los ganaderos mierenses. Nos últimos años los ayuntamientos babianos vienen demandando la expropiación d’estos terrenos, asina como denunciando otros usos per parte del consiostoriu mierense.

Agora mesmo, dende la Casa de Cultura Teodoro Cuesta de Mieres un equipu de trabayu coordina la memoria d’estos vieyos ganaderos mierenses pa poner al día lo que fuera la sienda de la treshumancia dende’l propiu conceyu y dende los conceyos de los alredores del centru y sur d’Asturies hasta los pastos babianos.

Dende l’Altu’l Cordal, na llende de Morcín, Riosa, Mieres y L.lena, el ganáu siguía la llinia de la cordal hasta Mestes, enriba de Muñón Cimeru, p’baxar pel Mayéu Espines hasta’l cruce de l’actual carretera ente L.lena y Quirós. Dende ellí, tres d’una llarga travesía alredor de los 1200 m d’altor, cruza los puertos de Las Bobias y La Cruz p’abaxar a Tuiza Baxo y dende ellí algamar La Portiella, entrada natural del puertu Pinos.

Anguañu, bien d’esti traxectu ta ocupáu pela carreterina rural que xune l’Altu’l Cordal col puertu La Cobertoria, pero bona parte continúa pudiendo facese a partir de l’antigua rede de siendes ganaderes. L’últimu trechu, igualmente, ente Tuiza Baxo y La Portiella, cuenta dende va años con asfaltáu, por más que nun pueda utilizase más que nos meses de branu.

La intención del trabayu de recuperación de la memoria de la vieya sienda de la trehumancia ganadera ye dar a conocer la gran importancia de la ganadería hasta tiempos bien recientes y como un camín d’estes característiques sirvía pa xunir el centru d’Asturies colos pastos de la cordelera en malapenes un par de díes (qu’agora grupos montañeros a bon pasu puen facer nel día).