Xinebra (E.P.) .-La Organización Mundial de la Salú decidió declarar el biltu de ébola que mató a más de 900 persones en dellos países d'África occidental como una emerxencia sanitaria internacional, de la que pidió a los países afectaos que declaren la emerxencia a nivel nacional y qu'estremen les midíes de protección.

   "Declaro que'l biltu actual d'ébola ye una emerxencia de salú pública de preocupación internacional. La decisión foi unánime", afirmó la directora xeneral de la OMS, Margaret Chan, nuna comparecencia informativa ante la prensa tres la xunta del Comité d'Emerxencia de l'axencia de Naciones Uníes, que foi l'órganu que decretó por unanimidá la declaración de la emerxencia sanitaria internacional.

   El Comité d'Emerxencia de la OMS reunióse esti miércoles y xueves p'analizar la situación creada pol biltu d'ébola. Los miembros y asesores d'esti órganu de la OMS analizaron la situación del biltu, les sos posibles consecuencies y emitieron una serie d'encamientos pa frenar la espansión d'esta enfermedá contaxosa.

   Na sesión informativa celebrada esti vienres, la OMS aseguró que'l biltu d'ébola constitúi "un fechu estraordinariu" y alertó que representa un riesgu sanitario pa otros países, amás de los directamente afectaos por contaxos y fallecimientos d'enfermos.

   Nesti sen, avisó sobre les posibles consecuencies que tendría una espansión internacional del ébola porque sería "particularmente grave" dada la virulencia del virus, los sos patrones de tresmisión y los "débiles sistemes de salú" nos países más afectaos pola enfermedá.