Xerusalén (E.P.) .-Un neñu de 10 años d'edá morrió y otros once palestinos resultaron firíos nun bombardéu israelín sobre la Franxa de Gaza al poco d'acabar l'altu'l fueu pactáu coles milicies d'Hamás, según informaron fontes del Ministeriu de Salú gazacín a l'axencia de noticies palestina Maan.
El fináu ta identificáu como Ibrahim Zuheir al Dawawseh, de diez años d'edá, que resultó mortalmente algamáu por un proyectil israelín xunto con otres cinco persones que resultaron firíes cuando s'alcontraben cerca d'una mezquita nel distritu de Sheij al Radwan, en Ciudá de Gaza.
Israel tamién efectuó ataques aéreos nel norte de la Franxa, Rafá y Jabaliya. Otros seis palestinos resultaron firíos nestes poblaciones.
La tregua acabó oficialmente esti vienres pela mañana, cumplíes les 72 hores de vixencia. Dende l'entamu de la operación militar israelín Marxe Protector, más de 1.800 palestinos morrieron na Franxa de Gaza, na so mayoría civiles. Los enfrentamientos con Hamás y les milicies islamistes acabaron cola vida de 64 militares israelinos y trés civiles.
