"Plantega un subsidiu a nivel estatal pa paraos ensin ingresos, mentes n’Asturies caltién a más de 5.000 families en llista d’espera del salariu social al que tienen drechu"

Andecha Astur calfica de desvergoña dafechu la propuesta de la nuea executiva del PSOE d’un subsidiu de 426 euros pa paraos ensin ingresos, non porque nun comparta esa necesidá –entá cuandu ta plantegada en términos inxustificablemente restrictivos- nin porque nel so momentu, cuandu teníen responsabilidaes de gobiernu a nives estatal y esistía la mesma problemática nun l’aplicaran, sinon porque agora mesmo, nel nuesu país, el PSOE, nel gobiernu del “Principado” non solo non apreba una midía asemeyada, sinon que caltién a más de 5.000 families asturianes en llista d’espera por un salariu social dende va más d’un añu.

Po ello resulta especialmente vergoñante ver que mentes Mª Luisa Carcedo, hincha’l papu pa presentar la so propuesta en Madrid, los sos compañeros n’Asturies nun tienen dengún inchente pa caltener a  5.000 llares asturianos nuna situación de necesidá dafechu, ensin denguna triba d’ingresos, a la espera demientres más d’un añu por un salariu social al que tienen drechu y que’l “Principado” nun acaba de xestionar ¡Pesia presumir de superavit nes cuentes del “Principado”!. Por nun citar qu’a díi de güei hai ná menos que 43.000 presones rexistraes nos servicios públicos d’emplegu asturianos que nun cobren prestaciones.

Y ye que dende Andecha Astur yá nun pidimos al gobiernu del PSOE nel “Principado” qu’asuma la so responsabilidá pa col Pueblu Asturianu y tome les necesaries midíes de proteición social y dinamización económica, sinon qu’a lo menos cumpla coles de yá por sigo escases funciones, y polo menos sepa xestionar cola premura precisa les demandes de salariu social al que tienen drechu eses 5.000 families asturianes y dea una rempuesa a esos 43.000 asturianos que nun cobren prestación dala.