El primer ministru de Rusia, Dimitri Medvedev, anunció que'l país va dexar d'importar frutes, verduras, lácteos, carne y pexes de la Unión Europea, Estaos Uníos, Canadá, Australia y Noruega, en respuesta a les sos sanciones pola inxerencia del Kremlin n'Ucrania.
La prohibición a la importación d'estos productos va tar vixente mientres un añu, a contar dende esti xueves, tal como taba previsto, anque dellos medios de comunicación rusos apuntaron que va ser revisable.
"Nun hai nada bueno nes sanciones, y nun foi una decisión fácil de tomar, pero teníamos que facelo", dixo Medvedev na xunta ministerial que celebró esti xueves.
El presidente rusu, Vladimir Putin, firmó'l miércoles un decretu pa prohibir la importación de productos agrícoles y alimentarios de los países qu'aprobaron sanciones hai poco contra dirixentes y entidaes ruses.
Amás, el xefe d'Estáu ordenó al Gobiernu qu'ellaborara una llista de los productos que van vese afectaos. El Serviciu de Vixilancia Veterinariu y Fitosanitariu (VPSS) yá adelantó que les prohibiciones seríen "sustanciales" pa la UE y Estaos Uníos.
"Tamos analizando l'anunciu que fizo Moscú", dixo'l voceru de la Comisión Europea, Frédéric Vincent. Una fonte comunitaria indicó a RIA Novosti que se trata d'una decisión contraproducente ya inxustificada", anque sorrayó que los Ventiocho nun van dar a conocer la so postura oficial hasta que se publique la llista completa de productos vetaos.
Pela so parte, el diariu rusu 'Kommersant' informó esti xueves de que Rusia entama prohibir tamién la importación de productos agrícoles y alimentarios d'Ucrania. De confirmase, les perdes económiques pa Ucrania podríen algamar los 1.300 millones de dólares (971 millones d'euros) diarios, dao que se trata del mayor esportador de productos agrícoles a Rusia.
PROVEEDORES LLATINOAMERICANOS
El VPSS tamién reveló qu'entama contactar colos representantes diplomáticos de dellos países llatinoamericanos pa consulta-yos sobre la posibilidá d'ampliar les importaciones de productos agrícoles y alimentariEs.
"Les xuntes con embaxadores de Brasil, Chile y Ecuador y col encargáu de negocios d'Arxentina en Rusia celebrarán el 7 d'agostu y van centrase nes perspectives d'ampliar les sos importaciones alimentaries al mercáu rusu", dixo nun comunicáu.
El VPSS añede que'l Kremlin llevantó toles restricciones impuestes a les empreses brasileñes, que yá manifestaron el so interés por ampliar les sos esportaciones de productos cárnicos y lácteos al país euroasiáticu.
El presidente de l'Asociación Brasileña de Proteínes Animales (ABPA), Francisco Turria, afirmó que podríen enviar a Rusia hasta 150.000 tonelaes adicionales de pirtu al añu, acordies cola axencia de noticies Reuters.
