El xuez de l'Audiencia Nacional Santiago Pedraz decretó l'ingresu en prisión del auditor de la firma M&A José Antonio Díaz Villanueva, qu'avaló les cuentes de la compañía de redes wifi Gowex, dempués de que se cumpliera'l plazu que tenía pa depositar la fianza de 200.000 euros que-y impunxo pa evitar el so ingresu en prisión, informaron fontes xurídiques.
El maxistráu dictó esti martes un autu nel qu'ordena al Cuerpu Nacional de Policía "la llocalización, detención y conducción a prisión" de Díaz Villanueva, que ta acusáu de dar la cobertoria necesaria al expresidente de Gowex, Jenaro García, pa que se llevara a cabu'l falsiamientu de les cuentes y la información económica y financiera de la entidá.
El xuez estableció esta fianza, a pidimientu del fiscal Anticorrupción Antonio Romeral, y en teniendo en cuenta la gravedá del delitu imputáu, la pena que podría imponése-y nun eventual xuiciu oral, que podría superar los nueve años de cárcel, y el riesgu de que se fugara pa resalvar procedimientu.
L'auditor, que recurrió la fianza que se-y impunxera, acudió esti llunes a l'Audiencia Nacional en compañía del so abogáu pa intentar falar col xuez instructor y esplica-y que nun disponía del dineru necesario pa cumplir con esta midida cautelar.
