Les dos muyeres deteníes esti fin de selmana en Melilla son una menor d'edá y una moza de malpenes 19 años a les que, según la versión policial, yá reclutaren pa dir combatir a Oriente Mediu. Según Interior, diben treslladales "de forma inminente" a una zona ente Siria ya Iraq pa integrase nes files del grupu terrorista Estáu Islámicu. Fontes de la llucha antiterrorista precisaron a Europa Press qu'ambes cuenten con nacionalidá española.
Los supuestos planes d'estes dos moces de sumase a la yihad atayaríense cuando axentes de la Comisaria d'Información de la Policía Nacional procedieron al so arrestu xusto cuando pretendíen cruzar la frontera y integrase en Marruecos pa contactar cola célula que les reclutara. La operación tuvo llugar a primer hora de la tarde del pasáu 2 d'agostu en coordinación coles Brigaes d'Información de les Xefatures Superiores de Ceuta y Melilla nel pasu fronterizu melillense de Beni Enzar.
Trátase de la primer vez que les fuerces de seguridá detienen a muyeres captaes pa la Yihad y que s'alcontraben na fase de treslláu a les zones de conflictu. Una d'elles ye Fauzia Allal Mohamed, nacida'l 8 de marzu de 1995 en Melilla. Estos arrestos produxéronse tres el llamáu a la Yihad que realizó'l pasáu 1 d'agostu na ciudá iraquina de Mosul, l'autoproclamáu califa del Estáu Islámicu, Abu Bakr Al Baghdadi.
Esta operación policial tuvo dirixida y supervisada pol Xulgáu Central d'Instrucción númberu ún de l'Audiencia Nacional que dirixe Santiago Pedraz.
Foto: Europa Press.
