Madrid.-El Tribunal Superior de Xusticia de Madrid (TSXM) paralizó cautelarmente l'ampliación del estadiu Santiago Bernabéu al ver "conexón directa" cola investigación abierta pola Comisión Europea poles posibles ayudes públiques recibíes pol club de fútbol Real Madrid.

   Nun autu fecháu'l 31 de xunetu y recoyíu por Europa Press, la Xusticia almite asina la solicitú de suspensión presentada por Ecoloxistes n'Acción en xunu d'esti añu y suspende l'acuerdu del Conseyu de Gobiernu de payares del 2012, qu'habilitaba l'ampliación, en tanto se dicte resolución per parte de la Comisión Europea.

   La Comisión notificó a España per carta'l 18 d'avientu del 2013 la so decisión d'entamar un espediente por una posible ayuda del Conceyu de la capital al Real Madrid al traviés d'un conveniu suscritu'l 29 de xunetu del 2011 pa "resolver una cuestión xurídica pendiente referida a una permuta de bienes inmuebles que foi oxetu de dellos convenios en 1996 y 1998".

   En concreto, el 29 de payares de 1996 el Real Madrid soscribió un conveniu col Conceyu de Madrid pol que'l club acordaba ceder un terrén asitiáu na Ciudá Deportiva y, a cambiu, el Conceyu comprometíase a aportar al Real Madrid dellos terrenes a determinar con posterioridá.

   El 29 de mayu de 1998, el Real Madrid y el Conceyu soscribieron un nuevu conveniu  cola cuenta d'executar el conveniu de 1996. El Conceyu de Madrid comprometióse a entregar al Real Madrid dellos terrenos, ente ellos una parcela en Las Tablas, co un valor estimáu en 595.194 euros