Madfrid (E.P.) .-El nuevu secretariu xeneral del PSOE, Pedro Sánchez, apostó por "traducir" el Concordatu d'España cola Santa Sede nuna Llei de Llibertá Relixosa "que garantice'l fechu relixosu y la igualdá de toles relixones que conviven n'España, principalmente la católica".

   "El PSOE, cuando reivindica'l fin de los acuerdos cola Santa Sede reivindica la madurez del estáu español pa garantizar la llibertá del fechu relixosu. Nun tamos diciendo que s'acabe col Concordatu y puntu final. Dicimos que queremos tornar esi acuerdu, que ye un acuerdu internacional, con una aprobación d'una llei de llibertá relixosa", sorrayó en declaraciones a Onda Cero recoyíes por Europa Press.

   Nesti sen, apuntó que'l Concordatu ye "perfectamente revisable" y que una llei de llibertá relixosa ye "sinónimu de modernidá y garantía de que l'Estáu tien recursos abondo qu'a lo meyor fai 35 ó 40 años nun tenía".

   Sánchez esclaró que los socialistes "nun son anticlericales" pero considera que'l fechu de que nel sieglu XXI "la Ilesia católica cuente cola condición de fedatariu públicu nun ye daqué xustificable". Amás, criticó que la Conferencia Episcopal Española (CEE) "influya como lo ta faciendo agora, nes decisiones de los políticos".

   Concretamente, indicó que l'alderique na educación pública "nun pue ser siempre el de la voluntá de la CEE de volver introducir la relixón como asignatura evaluable". Al so xuiciu, son otres les cuestiones qu'interesen a los padres al respecto de la educación de los sos fíos. En tou casu, mostróse partidariu de que s'imparta Historia de les relixones, pero de toes.