Andecha Astur considera inxustificable un actu que pretende educar a los neños "fasta 10 años" na tortura y asesinatu públicu d'un animal, y responsabiliza direutamente al Ayuntamientu de Xixón por nun tomar les midíes llegales afayaices pa torgar semeyante xabazada y por collaborar económica y publicitariamente colos eventos taurinos en Xixón, responsabilidá que comparte col "Principado" por nun cuntar con una llei escontra'l maltratu animal que prohiba dafechu esta espresión d'incultura y crueldá tan contraria a la sensibilidá y la cultura asturiana y tan vinculada al más ranciu españolismu.

Ello asina, Andecha Astur sofita toles campañes anguañu esistentes escontra l'espectáculu que pretende "educar" a los neños asturianos nesa espresión de crueldá, y con toes aquelles otres empobinaes a l'aprebación d'una llexislación asturiana escontra'l mal tratu animal y que mos llibre de semeyante espresión españolista de crueldá, participando activamente tantu na recoyía de firmes qu'agora mesmo ta llevándose alantre, comu na concentración entamada por Asturies Antitaurina pal prósimu martes 12 d'agostu a les 11 en La Escalerona.