Polo menos 20 militares de les Fuerces Armaes ucranianes morrieron esti vienres de resultes d'un ataque con misiles Grad cometíu por milicianos separatistes prorrusos nel este del país na nueche del xueves al vienres, informó la cadena de televisión ucraniana Canal 112.
Mandos militares aseguraron qu'una unidá de paracaidistes resultó atacada con morteros y carros de combate cerca de la población de Shajtarsk, na mesma rexón na que'l pasáu 17 de xunetu estrellóse'l vuelu MH17 con 298 persones a bordu.
La Canal 112 nun dio más detalles sobre lo asocedío pero aseguró qu'hai polo menos 20 militares muertos, una cifra que mandos militares consideren un balance demasiao eleváu. "20 paracaidistes ucranianos morrieron nun ataque con misiles Grad cerca de Shajtarsk", señaló la cadena.
Les fuerces gubernamentales ucranianes intensificaron la so ofensiva contra los separatistes nel este del país dende la cayida del MH17, supuestamente valtáu por un misil llanzáu dende territoriu controláu polos sublevaos. Los milicianos prorrusos concentráronse nos sos dos principales bastiones, les ciudaes de Donetsk y Lugansk.
Nel so últimu informe, publicáu esta selmana, Naciones Uníes aseguró que'l conflictu ente les fuerces dirixíes poles autoridaes de Kiev y los milicianos separatistes prorrusos acabó cola vida de más de 1.100 persones y dexó cerca de 3.500 firíos ente mediaos d'abril y el 26 de xunetu.
