Madrid (E.P.).- La Organización Mundial de la Salú (OMS) elevó esti xueves a 729 muertos el balance pol biltu d'ébola, en rexistrándose 57 nuevos decesos ente'l 24 y el 27 de xunetu en Guinea, Liberia, Nixeria y Sierra Lleona. El númberu total de persones contaxaes xube yá a 1.323.
El país más afectáu sigue siendo Sierra Lleona, onde yá se confirmaron --o polo menos figuren como probables-- 533 casos, de los que 233 perdieron la vida. En Guinea, rexistráronse 460 casos con 339 muertos, mientres qu'en Liberia la OMS contabiliza yá 100 infectaos, incluyíes 72 persones que perdieron la vida.
La OMS tamién afirmó que les autoridaes de Nixeria identificaron hasta'l momentu a 59 persones que tuvieron en contactu con un ciudadanu d'Estaos UNíos, que morrió en Llagos la selmana pasada en llegando procedente de Liberia vía Togo y Ghana. Trátase de la única víctima rexistrada hasta'l momentu en territoriu nixerianu.
L'axencia internacional anunció'l llanzamientu d'un plan d'emerxencia de 100 millones de dólares col que responder a esti biltu d'ébola "sin precedentes", como lo definió la directora xeneral, Margaret Chan.
La máxima responsable de la OMS sorrayó que, dada la magnitú del biltu y "l'amenaza" que representa, ye momentu de "llevar la respuesta a un nuevu nivel", según l'axencia Reuters. Esti nuevu estadiu requier "más recursos", asina como "coordinación" ente les partes, dixo Chan, qu'alvirtió que fai falta personal médico, incluyíos médicos, enfermeres y epidemiólogos.
Foto: AMANDINE COLIN/MSF
