Bonos Aires (E.P.) .-El Gobiernu arxentín negó esti xueves que'l país s'alcuentre nuna situación de suspensión de pagos y aseguró que se trata too d'una "mentira absurda", dao qu'Arxentina ye solvente y yá entregó a últimos de xunu'l dineru qu'agora tendríen que reclamar los tenedores de deuda.
Tres una batalla xudicial n'Estaos Uníos colos fondos que se negaron a participar nos últimos truecos de deuda --reclamen unos 1.500 millones de dólares--, el país suramericanu a lo último nun llogró un acuerdu primero que venciera, a medianueche, el plazu p'atayar intereses de los sos bonos Discount.
Bonos Aires depositó 539 millones de dólares a últimos de xunu nel Bank of New York Mellon (BONY) pa cumplir con estos intereses, pero'l procesu nun llegó a completase por decisión de la Xusticia arxentina.
"Arxentina pagó, y polo tanto los tenedores tienen qu'exixir el so pagu, tienen d'exixir al xuez los fondos depositaos por Arxentina", sorrayó en rueda prensa'l xefe de Gabinete, Jorge Capitanich, que volvió solicitar un 'stay' --midida cautelar-- pa lliberar esos fondos.
Por esti motivu, describió como una "mentira absurda" la consideración d'Arxentina como un país en suspensión de pagos, según los medios llocales. L'axencia de calificación creiticia Standard & Poor's yá rebaxó'l martes la deuda arxentina a la categoría 'default selectivu'.
Capitanich llamentó "la campaña mediática que pretende llanta-y la responsabilidá al Gobiernu arxentín" y insistió en que la postura del Executivu foi "coherente" a lo llargo de tol procesu. Sicasí, denunció la supuesta parcialidá del xuez estaounidense Thomas Griesa y la "marcada incompetencia" del so mediador, Daniel Pollack.
El xefe de Gabinete abrió la puerta a recurrir a organismos internacionales como la Corte Internacional de Xusticia (CIX) o Naciones Uníes, por culpa de que considera que "la comunidá internacional nun pue avalar l'acción "de grupos minúsculos", n'alusión a los denominaos 'fondos utre'.
"Defender la posición arxentina ye defender la soberanía", añadió Capitanich.
