Xinebra (Reuters/EP).-L'Alta Comisionada de Naciones Uníes pa los Derechos Humanos, Navi Pillay, alertó de la "impunidá" con que podría tar actuando Israel na Franxa de Gaza y pidió a la comunidá internacional que recuerde les "obligaciones llegales" que tienen de respetar les autoridaes israelines.

   Pillay recordó qu'Israel atacó viviendes, escueles, hospitales ya instalaciones de la ONU nel marcu de la so ofensiva militar na Franxa, entamada'l pasáu 8 de xunetu. "Paez que tán desafiando, arremente, les obligaciones que la llei internacional impón-yos", apuntó l'Alta Comisionada en rueda prensa.

   "Por esto, digo una y otra vez que nun podemos dexar la impunidá, nun podemos dexar que naide rinda cuentes polo que ta pasando", añadió Pillay, una de les voces más crítiques de la ONU cola operación militar israelina.

   Pillay, sicasí, tamién condenó les acciones d'Hamás, a la qu'acusa de violar la llei humanitaria internacional al disparar cohetes de forma indiscriminada contra territoriu israelín. Algunos d'estos proyectiles van dirixíos contra zones densamente poblaes.

CRÍTIQUES A EEUU

   Les crítiques de Pillay tamién algamen a Estaos Uníos, el principal aliáu d'Israel, por culpa de que considera que Washington nun ta exerciendo tola so "influencia" pa frenar a la violencia. Según Pillay, l'Alministración de Barack Obama tien de facer más pa "detener les muertes" y "llevar a les partes a la mesa de negociación".

   L'Alta Comisionada de Naciones Uníes espresó'l so malestar pola recurrente defensa qu'Estaos Uníos fai d'Israel en foros de la ONU como'l Conseyu de Derechos Humanos, l'Asamblea Xeneral o'l Conseyu de Seguridá.

   Per otra parte, Pillay mentó l'apoyu militar qu'Estaos Uníos brinda a Israel, dao qu'anque  nun entregó armamentu pesáu que puea tar utilizándose en Gaza, sí invirtió "casi un millón de dólares" nel escudu antimisiles. "Nun se ta aportando la mesma protección a los gazacinos frente a los bombardeos", dixo.

RINDICIÓN DE CUENTES

   Pillay denunció que, nos últimos años, Israel nun realizó "investigaciones afayadices" que permitan esclarar los crimes cometíos mientres operaciones anteriores en Gaza y castigar a los responsables. Nesti sen, apuntó la posibilidá de qu'ente en xuegu'l sistema internacional si Israel nun actúa.

   Namás se xulgó a cuatro soldaos  pol so papel na operación 'Plomu fundío', llevada a cabu ente avientu del 2008 y xineru del 2009, incluyíu ún pol supuestu robu d'una tarxeta bancaria. Pillay nun confía en qu'agora la historia vaya a cambiar ya Israel investigue de forma apropiada les posibles violaciones que taríen cometiéndose mientres el 'Marxe Protector'.