Xerusalén (E.P.) .-Polo menos 17 palestinos morrieron y unos 200 resultaron firíos por un bombardéu llanzáu poles fuerces d'Israel nel entornu d'un mercáu del barriu de Shujaia, na ciudá de Gaza, a pesar de que l'Exércitu acordara una tregua humanitaria de cuatro hores.

   Un voceru del Ministeriu de Sanidá gazacín, Ashraf al Qidra, esplicó a l'axencia palestina Maan que l'ataque, atribuyíu a l'aviación israelina, prodúxose a les seis de la tarde, una hora antes de la hora prevista d'acabación del altu'l fueu.

   Les Fuerces de Defensa israelines anunciaren una tregua de cuatro hores de duración qu'entamaron a aplicar a les 15.00 hores d'esti miércoles (14.00 hora peninsular española), anque yá alvirtieron de que siguiríen coles operaciones p'alcontrar y destruyir túneles usaos por milicianos del Movimientu de Resistencia Islámica (Hamás).

   Fontes oficiales gazacines cifraron en 17 el númberu de muertos nel ataque al mercáu ya incluyeron ente les víctimes mortales a dos trabayadores de los servicios médicos y un periodista. Esti último ta identificáu como Rami Rayen, fótógrafu de la Rede Palestina de Periodismu y Medios.

   Coles víctimes del mercáu, polo menos seríen 27 los palestinos finaos mientres el supuestu altu'l fueu, según el balance recoyíu pola axencia Maan, que confirmó con fontes palestines la muerte d'otres 12 persones.

   Primero que entrara a valir esti altu'l fueu, les fuerces israelines yá mataren a más de 70 palestinos namás esti miércoles, lo qu'eleva penriba de 1.300 el númberu de persones finaes en Gaza dende l'entamu de la ofensiva militar 'Marxe Protector'.