"Agora'l congresu zarróse y yá ta", aprofió Fernández en declaraciones a los periodistes, mientres los delegaos acababen de votar la llista de la Comisión Executiva Federal presentada pol nuevu secretariu xeneral, Pedro Sánchez.

   El presidente asturianu insistió en que "oxetivamente" la federación asturiana tien "una representación bona" na Comisión Executiva, como "nunca" tuviera, con dos persones al cargu de "secretaríes bien importantes", Adriana Lastra en Política Municipal y María Luisa Carcedo en Bienestar Social.

   Amás, él sigue formando parte de la Executiva como miembru natu, como facía hasta agora, y deseaba siguir faciendo, dao que cree qu'un presidente autonómicu nun pue ocupar una secretaría nin una vocalía porque nun podría algamar les espectatives de "trabayu" que demanden.

   Fernández almitió que los asturianos teníen "alguna otra expectativa que nun se cumplió", dao qu'antes, na anterior época yera coordinador del Conseyu de Política Territorial, qu'agora va pasar a presidir la xefa del Executivu andaluz, Susana Díaz. Asina, pese al malestar y l'enfadu que xeneró esti relevu na federación asturiana, que complicó'l zarru de la Executiva, quitó trescendencia a estos problemes.

   "Los congresos son asina, unu plantégalos d'una manera y dempués a lo llargo del día, de la nueche, hai debates, discutinios y a lo último zárrense", esplicó, calcando en que considera que "se zarró satisfactoriamente" p'Asturies.