Incluyir ente les aportaciones del Estáu a Asturies les xubilaciones y los fondos mineros costitúi una aberración ensin más oxetu que'l xenerar la falsa impresión de que l'Estáu que mos funde ye'l que mos caltien.

El “Principado” cómpliz al tolerar esti agraviu y nun ser a desendolcar una fiscalidá propia.

La balanza fiscal ellaborada pol Estáu español na que presenten a Asturies comu beneficiaria de les aídes del Estáu  a base d'incluyir ente les sos pretendíes aportaciones les xubilaciones –un drechu de los trabayaores asturianos pal que demientre tola so vida llaboral tovieron cotizando, colo que nun son aportaciones, sinón devoluciones- o los fondos mineros recibíos de la Xunión Europea pol esfarrapamientu del texíu minero asturianu, y que en gran midía tán reteniendo en Madrid pal so propiu beneficiu, costitúi un auténticu atentáu al sentíu común y una burlla a Asturies y al Pueblu Asturianu, al que se lu presenta comu beneficiariu d'un Estáu que precisamente ye'l que ta llevándomos a la ruina destruyendo sistemáticamente el nuesu texíu económico.

Pero inclusive asina, recurriendo a l'arbitrariedá, el balance fiscal español espeya la rialidá d'un país otrora ricu (d'ende les xubilaciones) que sufrió un selvaxe procesu de desindustrialización (d'ende los fondos mineros), que nun tien denguna capacidá política pa xestionar los recursos que-y lleguen (por eso los fondos mineros queden en Madrid) y que na actualidá atopase ensin trabayu (por eso nun hai cotizantes) nin industria propio (por eso nun hai empreses que coticen en Asturies).

Per otru llau, de nuevu'l papel del “Principado” torna a quedar n'evidencia comu la istitución impuesta que ye, darréu que non solo tolera semeyante agraviu, sinón que collabora col mesmu sofitando la falsa idega de ser beneficiarios d un Estáu que mos destrúi. El “Principado” adolez de voluntá política pa xenerar una fiscalidá propia que torgue que les empreses asitiaes n’ Asturies coticen en Madrid, onde tienen más beneficios fiscales que n’ Asturies, o discrimine positivamente a aquelles que lo faen en Asturies a la hora de sovenciones y / o concesiones d'obres.