El centru, ubicáu na zona de Beit Hanoun, valía de refuxu pa cientos de persones qu'intentaben escapar de la violencia. L'axencia palestina Maan alertó de que podría haber decenes de víctimes.

   La Unrwa tamién confirmó'l bombardéu. El so voceru, Chris Gunnes, aseguró en Twitter que l'ataque causó "múltiples muertes y mancaos". Un testigu esplicó a Maan que parte de los desplazaos alcuéntrense na zona d'entrada a la escuela cuando empezó l'ataque. Otra fonte declaró que polo menos cinco proyectiles impactaron nel edificiu.

   Más de 140.000 palestinos abandonaron les sos cases nes últimes dos selmanes pa escapar de la ofensiva israelina, denominada 'Marxe Protector'. Munchos d'ellos buscaron refuxu n'instalaciones de la Unrwa, anque l'axencia alertó de que nin siquier estos centros son seguros y dellos sufrieron ataques nos últimos trés díes.

   Trés profesores de l'axencia perdieron la vida nes últimes hores pola violencia que solmena Gaza, según Gunnes. Más de 700 palestinos morrieron dende l'entamu de la ofensiva israelina, el pasáu 8 de xunetu.