El ministru de Xusticia, Alberto Ruiz-Gallardón, llamentó esti xueves que l'Audiencia Nacional nun adoptara "midíes cautelares" pa evitar la escarcelación de narcotraficantes deteníos n'alta mar antes de conocer la decisión del Tribunal Supremu sobre l'aplicación de la reforma de la xusticia universal a estos casos.
Nuna entrevista en RNE Gallardón mostróse "bien satisfechu" cola decisión del Supremu, porque pon "llinies sólides" na interpretación de la norma y en que "nun pue haber impunidá", pero destacó que la so eficacia total ta condicionada a que los escarcelaos --un total de 53-- sigan n'España y puea detenéselos.
Sicasí, dexó claro que nun fala d'esixir responsabilidaes a los maxistraos de l'Audiencia Nacional, porque entiende que "actuaron según el so lleal saber y entender" y, simplemente, les sos resoluciones son "susceptibles de recursu".
Gallardón dixo qu'anque-y paecieren criticables les prieses de l'Audiencia, él nun va facer la crítica porque tien claro lo que-y correspuende a caún. Eso sí, señaló que non toos tienen claro esa separación: "anque determinaos xueces quieren participar nel alderique políticu, que correspuende a los que salieron escoyíos polos ciudadanos, el Gobiernu nun va entrar en facer crítica xurídica porque ési nun ye'l so papel".
