Uviéu (E.P.) .-El Gobiernu d'Asturies "nun va permitir" que se configure'l sistema de financiación autonómicu a partir de los datos que salgan de les balances fiscales. Asina lo afirmó'l conseyeru de Presidencia y vocera del Executivu asturianu, Guillermo Martínez, nuna rueda prensa posterior al Conseyu de Gobiernu.    "Anque tovía nun tenemos los datos, nun vamos aceptar que se tomen como puntu de partida pal repartu de la financiación", repitió. Estes balances, esplicó, reflexen el saldu ente lo que l'Estáu recauda y lo qu'invierte nos territorios, polo que "nun puen ser un elementu definitoriu". Nesti puntu recordó que'l Principáu pidió una conferencia de presidentes autonómicos pa tratar el nuevu sistema de financiación autonómicu, dao que "ye'l calce apropiáu" pa debatilu.    El superávit del Principáu d'Asturies ta en 1.666 millones d'euros según les cuentes públiques territorializaes presentaes esti miércoles pol espertu Ángel de la Fuente nel Ministeriu de Facienda y Alministraciones Públiques, y qu'asitien a la comunidá ente les que cuenten con saldu positivu nes balances fiscales.