Una llarga ovación trancó esti martes d’alborciada nel festival d’Aviñón la primer representación de “Enrique VI” del xoven director Thomas Jolly, qu’a lo llargo de 18 hores que dura la triloxía permaneció fidel al espíritu de William Shakespeare.

Llegaos a les diez de la mañana la viéspora a la sala de 600 asientos, cásique tolos espectadores permanecieron hasta la fin del espectáculu, que tuvo siete enteactos y caltuvo’l suspense d’una serie de televisión ensin perder la teatralidá shakespeariana del textu.

Fuera mester l’audacia d’un director bien mozu –tenía 28 años al entamar el proxectu y 32 años anguañu- pa montar esta obra descomanada. “Enrique VI” son tres obres nuna, con 15 acos y 150 personaxes, nun derroche de batalles y ríos de sangre desparramada.

La trama ye inabarcable, enllena de pares del reinu que se maten ente ellos na guerra de los Cien Años y la de les Dos Roses, interminable engarradiella sobre la llexitimidá del tronu.

En 13 hores d’espectáculu (ensin contar los enteactos) desfilen tolos rexistros de la dramaturxa de Shakespeare, dafechamente honraos con inventividá y bríu por un elencu de 21 actores, de la farsa la la traxedia, pasando por una fiesta tecno y un antroxu.

El festival d’Aviñón prevé tres representaciones d’esta maratónica obra, que va volver representase –anque dixebrada en tres partes más asequibles- n’avientu en Sceaux, a la vera de París, y en mayu nel teatru del Odeón de la capital francesa.