La cita produzse dempués del pidimientu per corréu electrónicu fecha por Artur Mas el 11 de xunetu y a la que respondió Rajoy con una llamada de teléfonu. Los dos decidieron que los sos equipos buscaren una fecha nes sos respectives axendes pa vese, momentu que se retrasó hasta últimos de mes, en viéspores de les vacaciones.

   Nun trescendió si hai un guión previu pa ordenar la conversación o non, si amás del interés de Mas por entamar una consulta independentista'l 9 de payares, ambos dirixentes van falar de financiación autonómico, d'inversiones o infraestructures. Según el presidente catalán, el referendu nun va ser l'únicu asuntu sobre la mesa.

DE REGÜEYU

   Rajoy y Mas reuniéronse la última vez hai casi un añu, a últimos d'agostu del 2013, un alcuentru secretu en Madrid que nun dio pie a nueves convocatories. Ello ye que si volvieron vese foi porque'l trabayu fízo-yos coincidir y tovía asina, en dalguna ocasión evitáronse, como nel Foru de Marques Renombraes Españoles el pasáu abril en Barcelona.

   La última ocasión en que s'alcontraron, anque fugazmente, tuvo llugar por cuenta de la proclamación de Felipe VI. El voceru de CiU nel Congresu, Josep Antoni Duran Lleida, aseguró que yá daquella Mas propunxo a Rajoy que se vieren, pero'l presidente del Gobiernu nun confirmó que fuera asina.

   Rajoy recibió mentanto a la plataforma Sociedá Civil Catalana; antes, amás, tendría tiempu de vese col nuevu secretariu xeneral del PSOE, Pedro Sánchez, anque esta cita nun ta de momentu prevista. El presidente siempre defendió la unidá d'acción colos socialistes nesti terrén y emponderó en público la sintonía col líder saliente, Alfredo Pérez Rubalcaba.