Escribe Javier Guijarro Ceballos nel so trabayu “El melólogo, el nombre de un género sin nombre” que nos estudios recientes de música y teatru na España de finales del sieglu XVIII llamóse melólogu a un xéneru qu’agrupaba obres dramátiques breves con intervalos de música instrumental, al estilu de la pieza llírica de Jean-Jacques Rousseau “Pygmalion”.

El melólogu extendióse per España ya Hispanoamérica ente l’últimu terciu del sieglu XVIII y el primeru del XIX y de siguío entró en decadencia. Dellos melólogos qu’algamaron fama nel tiempu n’España fueron “Guzmán el Bueno”, de Tomás de Iriarte, estrenáu en Cádiz en 1790, o el “Unipersonal del arcabuceado”, de mexicanu José Joaquín Fernández de Lizardi.

El sábadu 19 de xunetu volvía a la escena española nel Teatru Xovellanos de Xixón “El poeta escribiendo un monólogo”, textu d’Indefonso Mompié y música de Blas de Laserna. La interpretación corrió al cargu del actor y cantante pop Pablo Carbonell y la parte musical, baxo la dirección d’Aaron Zapico, fue inbterpretada porla Orquesta de Cámara de Siero. La obra en xunto fue dirixida por Laura Iglesias.

A lo llargo de la obra, el personaxe del escritor interpretáu por Pablo Carbonell va intentando escribir un monólogu, pa lo que tien d’ayudase del vino que sobre la mesa tien nuna xarra. Colo que, la obra, como tantes otres del monólogu tradicional asturianu, devuélvenos el personaxe popular del borrachu, siendo’l cumal de la obra’l momentu más desquiciador de la borrachera.

Con una entrada que rozó’l teatru enllenu, tres minutos d’aplausos despidieron al actor, director de la orquesta y directora del espectáculu.