El númberu de firíos por mor del accidente rexistráu esti xueves d'un tren d'alta velocidá (TGV, poles sos sigles en francés) con 178 persones a bordu y un tren rexonal, con 70 pasaxeros, aumentó a 40, según l'últimu balance facilitáu poles autoridaes.
Según medios franceses, el socesu tuvo llugar a 17 kilómetros de Pau, nos Pirineos Atlánticos, sobre les 17.38 hores, cuando'l TGV acababa de retomar la so ruta, polo que foi a poca velocidá, anque violentu.
El secretariu d'Estáu pa Tresportes, Frédéric Cuvillier, afirmó que'l sistema de señalización na vía na que se produxo'l choque taba "en caltenimientu", al tiempu qu'anunció que les revisiones van llevase a cabu "en tola rede ferroviaria".
"¿Hai una relación causal ente'l caltenimientu y l'accidente? Nada permite afirmalo nin escluyilu de momentu", manifestó Cuvillier, tal como recoyó'l diariu francés 'Le Parisien'.
La prefectura activó'l centru operativu departamental y el plan 'Orsec', un programa d'organización de socorru a escala departamental pa casos de catástrofes.
