Palma Mallorca. E.P. - El xuez instructor del casu Nóos, José Castro, considera que "manca" que la Infanta Cristina nun s'alcuentre imputada por un mayor númberu de delitos que los que nestos momentos pesen sobre ella -dos fiscales y ún de blanquéu-, compartiendo d'esta manera'l criteriu del exsociu d'Iñaki Urdangarin, Diego Torres, de que la so muyer recibió un "tratu desigual" en relación cola hermana del Rei Felipe VI.
Asina lo pon de manifiestu nel autu que dictó esti xueves pa caltener la imputación de Torres y la so muyer, Ana María Tejeiro, asina como del expresidente del Govern Jaume Matas y del altu cargu d'ésti Gonzalo Bernal, al apreciar abondos nicios incriminatorios pa que se sienten nel banquín de los acusaos nel marcu d'esta causa.
Na so resolución, el maxistráu atiende a les quexes feches pola defensa de Torres, aseverando que nun pue "por menos que coincidir" col so criteriu tocantes a que'l fechu de que la Infanta nun tea imputada de los delitos que-y archivó l'Audiencia Provincial de Baleares "pue verdaderamente mancar", pa la que sí s'enfrenta a ellos, en referencia a Tejeiro.
Nesti sen, entiende qu'a la muyer de Torres "pue resulta-y imposible o, polo menos, difícil evitar pensar que, comparativamente con aquélla [la Infanta], recibió un tratu desigual".
El xuez precisa sicasí que si escluyó a la duquesa de Palma de la comisión de determinaos delitos debióse a que l'Audiencia asina la ordenó en mayu del 2013, cuando archivó la so imputación respecto al papel que xugó al frente del Institutu Nóos y les sos actividaes supuestamente illegales, pese a que dexó abiertes les puertes a que la investigaren por presuntos delitos fiscales y de blanquéu.
