Trátase de l'acusación más grave llanzada hasta la fecha por Ucrania contra les Fuerces Armaes ruses, que siempre negaron la so implicación directa nel conflictu nel este d'Ucrania. El Ministeriu de Defensa rusu refugó comentar esta acusación.

   El voceru del Conseyu Nacional de Seguridá y Defensa, Andri Lisenko, denunció ante la prensa qu'al caza ucranianu derribólu'l miércoles de nueche un misil llanzáu por un caza rusu y que'l pilotu llogró espulsase de l'aeronave a tiempu y salvase. Trátase de la tercer ocasión nesta selmana en qu'un avión militar ucranianu resulta algamáu por un proyectil.

   Kiev denunció antes qu'un avión de tresporte militar Antonov An26 resultó valtáu'l llunes por un misil llanzáu dende Rusia. L'ataque acabó cola vida de dos de los ocho ocupantes de l'aeronave ucraniana.

   Esti miércoles, un misil supuestamente llanzáu por separatistes algamó a otru caza SU25 y el pilotu llogró llevar l'aparatu a tierra sin demasiaos daños. El Gobiernu de Kiev nun acusó a Rusia por esti incidente.

   Estos incidentes rexistráronse nun clima de tensión ente Ucrania y Rusia, coles autoridaes de Kiev acusando a Moscú de tar directamente implicáu nel conflictu nel este del so territoriu, una acusación que refuga'l Kremlin.

   Tres un día sin operaciones, les aeronaves de les Fuerces Armaes ucranianes retomaron esti miércoles les operaciones nel este del país. Lisenko aseguró qu'otros cinco militares ucranianos morrieron nes últimes 24 hores n'enfrentamientos colos separatistes prorrusos, lo qu'eleva a 270 el númberu total de finaos dende que'l Gobiernu llanzó n'abril la denominada operación antiterrorista na zona oriental del so territoriu.