ESTRASBURGU (FRANCIA), (EUROPA PRESS).-El plenu de la Eurocámara escoyó esti martes -por 422 votos a favor, 250 en contra y 47 astenciones- al conservador luxemburgués Jean-Claude Juncker como nuevu presidente de la Comisión Europea pa los próximos cinco años en sustitución de José Manuel Durao BarrosO. El so mandatu va empezar el próximu 1 de payares.
La elección de Juncker foi posible gracies al apoyu del PP européu y de la mayoría del grupu socialista y del lliberal. Estos trés partíos algamaron un acuerdu de llexislatura pa formar una mayoría proeuropea estable frente a la puxanza de los grupos euroescépticos. D'esta mayoría desmarcáronse los 14 eurodiputaos socialistes españoles, y tamién los británicos y suecos. Los socialistes franceses astuviéronse.
Juncker llogró más votos que'l presidente de la Eurocámara, Martin Schulz, que salió reelexíu'l 1 de xunetu con 409 votos gracies al mesmu acuerdu d'estabilidá. Tamién supera los 382 votos llograos por Barroso nel 2009 pal so segundu mandatu.
En contra del ex primer ministru luxemburgués votaron los eurodiputaos d'Izquierda Unitaria -grupu nel que tán Izquierda Unida y Podemos-; los Conservadores y Reformistes Europeos, el grupu de los conservadores británicos; el grupu euroescéptico dirixíu pol líder del UKIP, Nigel Farage; asina como la estrema derecha encabezada pola presidenta del Frente Nacional, Marine Le Pen.
Los líderes europeos designaron a Juncker -que foi'l candidatu del PP européu a la Comisión nes pasaes elecciones a la Eurocámara- nel conceyu del 27 de xunu cola única oposición de Reinu Uníu y Hungría. Pa que lu ratifiquen, l'ex primer ministru luxemburgués precisaba l'apoyu de la mayoría simple del Parlamentu, esto ye, de 376 eurodiputaos.
Tres la confirmación de Juncker pola Eurocámara, los Estaos miembros tienen que nomar agora a los sos candidatos pa comisarios. El nuevu presidente de la Comisión va decidir nes próximes selmanes sobre'l repartu de carteres y los distintos comisarios tendrán que pasar l'exame del Parlamentu en septiembre y ochobre.
La configuración del nuevu Executivu comunitariu va debatise la primer vez mañana nun conceyu estraordinariu de líderes europeos en Bruxeles al que va acudir el mesmu Juncker.
