Uviéu (E.P.) .-El voceru parlamentariu d'Izquierda Unida na Xunta Xeneral d'Asturies, Aurelio Martín, calcó esti llunes en que la so organización "nun tuvo nenguna responsabilidá" en nada referente al centru Niemeyer, y pidió al PSOE que dexe de correr "cortines de fumu" pa disimular "les responsabilidaes de los que tuvieron la xestión directa".

   En declaraciones a los medios, acabante salir de la Xunta de Voceros del parlamentu autonómicu, asina respondió'l diputáu a les crítiques del PSOE al dictame de la comisión d'investigación de les supuestes irregularidaes na xestión del centru cultural. El documentu va aprobase previsiblemente nel plenu parlamentariu d'esti xueves, col apoyu de tolos grupos sacante'l los socialistes. Éstos critiquen, ente otres coses, que nun s'incluya a IU nes responsabilidaes, puesto que la organización tenía a dos miembros nel Conseyu de Gobiernu del Principáu nel momentu que tuvieron llugar los fechos analizaos.

   Aurelio Martín, que foi ún d'esos dos conseyeros, matizó que la única responsabilidá que tuvo IU daquella foi la de votar en contra "cuando se propunxo ceder a la Fundación Niemeyer la infraestructura per 50 años". "Los dos conseyeros d'IU y cinco secretarios xenerales técnicos, de los que solo dos yeren d'IU, opunxéronse". Otra manera, recordó qu'al so partíu "nun lu informaron, nin participó nos debates, nin votó" nengún asuntu relacionáu col Niemeyer, polo que nun pudo tener nenguna responabilidá.

   Amás, recordó qu'IU exluyó del dictame a los exconseyeros socialistes Ana Rosa Migoya y Francisco González Buendía, precisamente polos mesmos motivos. "Siendo conseyeros nun teníen nenguna responsabilidá, nun debatieren, nin los informaren, nin votaren nada", esplicó. Por esti asuntu, demandó al PSOE que nun cuerra "cortines de fumu pa disimular les responsabilidaes de los que tuvieron la xestión directa".