El parlamentu de Turquía vien d’aprobar un paquete llexislativu pa facilitar el procesu de paz cola guerrilla kurda, informa’l diariu “Radikal” na so edición dixital.

La llei consta de seis mateires y la so aplicación tendrá de facilitar les negociaciones puestes en marcha en xineru de 2013 col illegal Partíu de los Trabayadores de Kurdistán (PKK) pa fomentar la reinserción de los ex guerrilleros na sociedá.

El paquete llexislativu va dar una base llegal a los contactos ente cargos políticos y dirixentes guerrilleros, que veníen sucediéndose va más d’un añu anque técnicamente podíen calificase de collaboración con banda armada.

Amás, la llei prevé midíes pa la reinserción de los guerrilleros que deseen “baxar de los montes·”, o lo que ye lo mesmo, dexar les armes y volver integrase na vida social del país. L’Estáu Mayor de les Fuerces Armaes turques informa con cierta frecuencia sobre la llegada de miembros del PKK que s’entreguen tres de dexar les armes.

La llei fuera unviada al parlamentu a finales de xunu y tramitóse con cierta urxencia pa poder entrar en vigor enantes del recesu de branu nel hemiciclu.

Los votos kurdos son fundamentales pal primer ministru, l’islamista Recep Tayyip Erdogan, na so candidatura a la presidencia de Turquía, que se va decidir nunes ellecciones a dos vueltes n’agostu que vien.