La ofensiva israelina llegó tres selmanes de tensiones catalizaes pol secuestru y asesinatu de trés mozos israelinos nel entornu d'Hebrón. Mientres los díes siguientes les fuerces de seguridá d'Israel llanzaron una operación de busca na que morrieron nueve civiles palestinos en Cixordania, asina como dellos más n'intercambios de disparos na Franxa de Gaza.

   La situación deterioróse dempués de qu'a un adolescente palestín secuestraralu y quemáralu vivu nel Monte de Xerusalén un grupu d'israelinos que presuntamente actuaron en venganza pol socesu previu. Polo menos trés de los seis deteníos confesaron participar nel asesinatu.

   A lo último, el martes entamó la operación Cantu Protector' contra Hamás, al qu'Israel acusa de tar detrás de la muerte de los trés mozos israelinos, pese a que la formación nególo y Tel Aviv nun aportó pruebes qu'apoyen les sos acusaciones. L'autoría del socesu reclamóla'l brazu armáu d'A'l Fatá, les Brigaes de los Mártires d'Al Aqsa.

   Pela so parte, les estayes palestines presentes na Franxa de Gaza dispararon más de 200 proyectiles contra territoriu israelín, sin que de momentu se rexistraren víctimes mortales n'Israel. Algunos de los cohetes impactaron nel entornu de Tel Aviv y Xerusalén.

SEMEYA: Ministeriu d'Interior Palestina