Los precios de la gasolina y del gasóil abaratáronse un 0,2% y un 0,6%, respectivamente, na última selmana, colo qu'atayen trés selmanes consecutives de subíes previes al entamu de la temporada braniega, según datos recoyíos por Europa Press a partir del Boletín Petroleru de la Unión Europea (UE).
En concreto, el preciu mediu de la gasolina nos surtidores españoles quedó en 1,452 euros, mientres que'l del gasóil marca 1,337 euros. Magar la baxada, la gasolina cuesta un 2,1% más que va un mes y el gasóil, un 1,6% más.
La gasolina tien agora un preciu un 3,1% superior al de xineru, y un 2,2% superior al de mesma selmana del añu pasáu, mientres que'l gasóil, que ye'l combustible utilizao pol 80% de los automovilistes españoles, encarecióse un 0,07% dende xineru y un 0,3% dende la mesma selmana de va un añu.
La rebaxa nos precios na última selmana produóxse nun momentu nel que'l barril de crudu Brent, de referencia n'Europa, abaratóse en dos dólares na última selmana, hasta 108 dólares, mientres que'l Texas 'sweet light' americanu fízolo en tres dólares, hasta 101 dólares.
Foto: EUROPA PRESS
