Nota de prensa del movimientu 22M n’Asturies:
Dende’l 22M n’Asturies y col apoyu de la plataforma estatal anunciamos que
vamos impulsar una selmana de debate y llucha social coincidiendo cola gala
d’entrega de los Premios Príncipe d’Asturies pa siguir EMBURRIANDO UN
CAMBIU SOCIAL. Vamos aprovechar esti eventu internacional con gran
presencia mediática pa da-y visibilidá a les nuestres reivindicaciones sobre la
renta básica, l’impagu la deuda y la inversión en servicios públicos. Nesa
selmana y como vien dándose nos últimos años, vamos tratar de
coordinanos col restu de colectivos sociales, organizaciones, empreses en
crisis, trabayadores y persones en xeneral, pa tratar de convertir la xornada
d’entrega de los Premios Príncipe d’Asturies nuna protesta masiva, de
carácter estatal, que visibilice les demandes de la sociedá civil a favor de la
paz, la xusticia social y la democracia, frente a la minoría poderosa reunida
nel Campoamor dispuesta a too pa defender la lóxica de l’acumulación de
capital per enriba l’interés colectivu y el bientar común.
Y ye que dende’l 22M consideramos estos premios, y mui especialmente la
so gala d’entrega, un eventu organizáu dende los mesmos poderes elitistes
qu’impulsen les polítiques d‘emprobecimientu masivu, la inxusticia social y el recorte de
llibertaes democrátiques. Too ello baxo’l paragües de la monarquía que sustenta’l réxime del 78 y
que simboliza como naide l’espilfarru, la corrupción y la continuidá de los privilexos d’una
minoría poderosa frente a una sociedá cada vez más probe.
Ye creciente l’espertar de la conciencia social crítico y de mayores demandes de
participación a favor de la xusticiasocial, frente al atrincheramientu del poder políticu y de 

los poderes financieros especulativos. Asina que dende'l 22M queremos contribuir a
impulsar esta convocatoria dende la movilización na cai, la suma de fuercia
social y la experiencia de les marches a Madrid.
Acompañaos d’un sinfín de personalidaes de ranciu abolengu, estos poderes
danse cita na entrega de los Premios Príncipe d’Asturies y pasen pela
alfombra colorada esperando la pleitesía y adoración de les sos súbdites.
Nun exerciciu d’hipocresía mayúscula pretenden autobarnizase y lexitimase
frente al pueblu a través del reconocimientu de causes sociales o
personalidaes que pueden conectar nesti sentíu cola ciudadanía.
Tal ye’l casu del premiu a Quino, el padre de Mafalda, que fue galardonáu
col premiu Príncipe d’Asturies de Comunicación y Humanidaes. Mafalda
enseñónos dende la infancia el valor del pensamientu críticu a favor de la
xusticia social, la paz y la democracia. Dende’l 22M n’Asturies, punxímonos
en contactu con ella lo primero que pudimos, buscando’l so apoyu pa la
organización de la selmana de llucha social que pretendemos desenvolver
n’Uviéu con motivu de la entrega de los Premios Príncipe nel Campoamor.
Agora queda pidi-y al so creador que s’informe de la situación social,
política, económica... n’Asturies y nel estáu español, qu’investigue un poco
quién ta tres los Premios Príncipe y que se ponga a la vera’l Pueblu, de la
ciudadanía y de la clase trabayadora. Nun-y costará demasiao atopar
vínculos directos ente los Premios Príncipe d’Asturies y los responsables de
la precaria situación de la mayoría social.
¡NUN SOMOS SÚBDITES! ¡SOMOS XENTE TRABAYADOR Y CON DERECHOS!
¡Nin paru, nin deuda, renta básica y servicios públicos!
¡EMBURRIANDO UN CAMBIU SOCIAL!
22M Asturies