Nun ye fácil ser Hillary Rodhan Clinton –n’España más conocida como Hillary Clinton, por más qu’ella siempre caltuviera’l so propiu apellíu-. El llibru d’ella véndese mal, los sos comentarios sobre les difucultaes financieres irriten a unos cuantos estadounidenses y les aventures sexuales que tuviera’l so maríu son ahora parte d’una comedia musical en Nueva York.

“Clinton, the musical”, que va llanzase en Nueva York el 18 de xunetu, condensa nun par d’hores los nobles ideales de les dos presidencies de Bill Clinton (1993-2001) y l’escándalu de Monica Lewinsky, becaria na Casa Blanca, que punxo en xaque’l so segundu mandatu.

Bil Clinton, que pa los estadounidenses mantiénse güei como ún de los meyores presidentes que tuviera’l país a pesar de los sos defectos, muéstrase en dods personaxes: l’estadista súper intelixente William y el seductor Bill.

Los domingos, William sueña con una cobertura universal, reformes n’asistencia social y con tresformar los Estaos Xuníos. Pero los sábados pela nueche, Bill sal en busca d’aventures amoroses y fai peligrar el restu.

Hillary, fundida por esa traición, sicasí respáldalu y edifica la so propia carrera política. Una Monica Lewinsky fogosa, el republicanu Newt Gingrich y el fiscal especial Kenneth Starr síguenlos de cerca. En momentos nos que Hillary Rodham ye obxetu de tou tipu d’especulaciones -¿será candidata a les ellecciones presidenciales de 2016-, el llanzamientu d’esta obra, nel marcu del Festrival de Teatru musical de Nueva York, nun podía ser más oportunu pal australianu Paul Hodge, el so autor y compositor de 26 años.

Hodge, que yá presentara la obra en Londres y nel Fringe, festival artísticu añal d’Edimburgu en 2012, explica que se sintiera ataryíu polos Clinton como pareya y poles sos personalidaes.