Madrid (E.P.) .-La Estaya Primera de la Sala de lo Penal de l'Audiencia Nacional absolvió de la comisión de delitos contra les altes instituciones del Estáu, atentáu y asociación illega a los 19 acusaos d'asediar el Parlamentu catalán el 15 de xunu del 2011 mientres una protesta convocada baxo la conseña 'Paremos el Parlamentu. Nun vamos dexar qu'aprueben recortes'.

   Los maxistraos Fernando Grande Marlaska, Manuela Fernández de Prado y Ramón Sáez Valcárcel condenaron a ún d'ellos, José María Vázquez Moreno, como autor d'una falta de daños a la pena de cuatro díes de llocalización permanente. Esti acusáu realizó una pintada nel llombu de la chaqueta de la diputada del Parlament Montserrat Tura con unos trazos.

   La Fiscalía solicitaba pa ellos cinco años y mediu de cárcel, asina como una multa de 7.500 euros. Los fechos tuvieron llugar el 15 de xunu del 2011, cuando una concentración convocada pol 15M ante'l Parlament derivó en situaciones d'asediu a más d'una decena de parlamentarios, ente ellos el presidente catalán Artur Mas, al que se-y torgó'l pasu cuando viaxaba nel so vehículu oficial, que golpiaron y solmenaron. A lo últilmo, tuvo qu'acceder a la cámara n'helicópteru xuntu con otros diputaos.

   La resolución especifica que tolos acusaos "exercieron el derechu fundamental de manifestación, sin que puea imputáse-yos actu algún que pudiera significar un escesu o abusu".

   Indiquen, amás, que nun existen pruebes qu'apunten a la comisión de los delitos imputaos y añaden que les conductes que s'atribúin a la mayoría d'ellos --dicen los xueces-- consistieron en participar na manifestación convocada en protesta polos recortes, permaneciendo nel llugar que les fuerces de seguridá clausuraren per mediu del zarru de les puertes d'accesu al parque qu'arrodia la sede del Parlament, y atopándose por ello con dalgún de los parlamentarios.

   La sentencia especifica que la llibertá d'espresión y el derechu de manifestación y de xunta "gocen d'una posición preferente nel orde constitucional y por ello ha ser oxetu d'una especial protección".