Fançois Hollande  amiya dennde’l cielu sobre’l patiu del Palaciu del Eliseu, en cayida llibre. El presidente lleva un cascu, que nun utiliza, y amuesa un xestu ente la placidez y la resignación, demientres la gravedá anticipa’l desastre.

Sobre la flotante figura del políticu pue lleese’l títulu del cómic: “Yo presidente. Hasta equí too va bien”, n’alusión a la metáfora qu’Hollande utilizó hasta en quince ocasiones durante un debate na campaña presidencial escontra’l conservador Nicolas Sarkozy, al que-y arrebató la xefatura del estáu en 2012.

Pero dos años depués d’aquel trunfu, la so popularidá ronda’l 20%, la más baxa d’un presidente na V República francesa, fundada en 1958. Ye precisamente’l so segundu añu na presidencia francesa’l que percuerre’l cómic escritu por Marie-Eve Malouines y difuxáu por Faro.

El cómic aborda los temes que marcaron l’annus horribilis d’Hollande –aconseyáu siempre poles pantasmes de dos difuntos socialistes, el presidente Mitterrand y el so primer ministru Pierre Bérégovoy- hasta los díes previos a la debacle socialista nes municipales del pasáu mes de marzu.

Les sos páxines describen l’escándalu del ministru d’Hacienda con una cuenta secreta en Suiza, la sonada deportación de Leonarda, una neña xitana sacada d’autobús escolar pa ser deportada a Kosovo, o la so borrascosa rellación colos socios ecoloxistes del gobiernu.

Pero, más que nada, expláyase sobre la so rellación cola entós primera dama, Valérie Trierweiler, y el so enguedeyu cola actriz Julie Gayet, a la que veía en París antroxáu con un cascu de moto nel númberu 20 de la yá célebre cai del Circu, de lo que destapó’l romance un reportaxe televisivu.