Madrid (E.P.).-  Los trés candidatos a la Secretaría Xeneral del PSOE, Pedro Sánchez, Eduardo Madina y José Antonio Pérez Tapias, presentáronse esti llunes nel debate entamáu nel marcu del Congresos Estraordinariu como'l "cambiu" que, na so opinión, precisa'l partíu socialista y comprometiéronse coles primaries abiertes nel próximu mes de payares pa escoyer al candidatu a la Presidencia del Gobiernu.

Nesti puntu, Madina anunció que si nun sal escoyíu cabezaleru del partíu nun va presentase a les primaries pa ser el candidatu a la presidencia del Gobiernu.

El primeru en falar foi'l diputáu madrilanu -por orde de recoyida d'avales--, que destacó que ye un militante de base que va un añu y mediu nun taba "en política" y esplicó que quier cambiar el PSOE pa dempués cambiar el país. Sánchez faló de les primaries abiertes respondiendo a la pregunta llanzada por Madina na so primer intervención, na que reivindicó esti compromisu pal mes de payares.

La moderadora, Carmen del Riego, recoyó esta pregunta y plantegó a los otros dos candidatos, que garantizaron que van respetar esti calendariu. "Voi facer primaries en payares", aseguró Sánchez, qu'hasta agora nunca fuera tan claru sobre la fecha de les primaries abiertes. "Nun vos quepa nenguna duda", dixo.

   Tamién se comprometió con esta fecha Pérez Tapias, qu'amás aseguró que, independientemente del resultáu d'esti Congresu Estraordinariu, nun va presentase a les primaries abiertes, porque cree que'l líder del PSOE y el candidatu a la Presidencia nun han ser la mesma persona.

   Amás, los trés comprometiéronse a facer una Executiva d'integración y d'unidá. Sánchez aseguró que quier contar colos otros dos candidatos si gana'l congresu y Madina dixo que'l partíu tien qu'aprender de los errores del anterior congresu y aseguró que, si lu escueyen, va integrar "al meyor del partíu".

   Na primer media hora del debate, Sánchez tamién llanzó otru mensaxe a Madina, que na so intervención inicial recordó qu'él pidió la participación de los militantes y vinculóla al so pasu al frente.

    El diputáu madrilanu retrucó-y que "la democracia ye patrimoniu de toos" y calcó en que la introducción del sistema de "una militancia, un votu", ye consecuencia de les resoluciones del congresu de Sevilla y la Conferencia Política del añu pasáu. "La democracia ye patrimoniu de toos y non solo d'ún", afirmó.