Un grupu de mediu centenar d’activistes ocuparon güei’l Muséu Nacional d’Arte Contemporaneu en Lisboa pa reclamar al gobiernu portugués más apoyu financieru a la cultura, el patrimoniu y l’arte.

La protesta entamara durante la nueche tres de la inauguración d’una instalación multimedia de denuncia política del artista portugués Rui Mourao nel muséu asitiáu nel céntricu Chiado de Lisboa. L’autor de la obra “Los nuestros sueños nun caben nes vuestres urnes” instó a los asistentes a ocupar la institución cultural, una de les más importantes del país, como una protesta política “en defensa del muséu y non escontra’l muséu”. Mourao expresó la indignación del públicu y de los creadores pol despreciu del gobiernu portugués al cine, el teatru, la ópera y otres artes, asina como a instituciones como museos y biblioteques.

Los asistentes amestáronse a la protesta del artista y mantuviéronse trancaos nel muséu a lo llargo de la madrugada hasta esta mañana, con presencia policial nel llugar, pero ensin que se produxeran incidentes. A lo llargo del día de güei los activistes cedieron a les presiones de la dirección del muséu y punxeron fin a la protesta cola llectura d’un manifiestu de reivindicaciones a favor de la promoción cultural.

Nel textu demándase una más grande financiación de la cultura qu’algame’l 1% del presupuestu estatal, conforme a les recomendaciones de la Unesco, asina como más apoyu al patrimoniu y a les entidaes artístiques, como museos y biblioteques.

El gobiernu portugués cerrara en 2011 el Ministeriu de Cultura ya integrara les sos funciones nuna secretaría dientro del departamentu d’Educación, como parte de la batería de recortes aplicada pa reducir el gastu públicu.