Madrid (E.P.) El Conseyu de Ministros incluyó dientro del paquete de midíes económiques aprobáu esti vienres un axuste de les retribuciones del sistema gasista por importe de 238 millones d'euros, equivalente a un 7% de los 3.350 millones de costos añales regulaos d'esti sector.

   Esti recorte de retribución tien como oxetivu rebaxar un déficit de tarifa atropáu nel sector del gas de 400 millones al cabu del 2013, qu'algamaría los 800 millones a finales d'esti añu.

   L'axuste va realizase amás sin necesidá de subir los peaxes de gas al consumidor, polo menos mientres nun haya fuertes cayíes de demanda nin significativos desaxustes temporales a partir del 2015.

   El 46% del recorte, o unos 110 millones, correspuende a la distribución, na que Gas Natural Fenosa, con un pesu del 70%, ye la principal empresa, y na que participen otros operadores como Redexis.

   El tresporte, del que se fai cargu nel so mayor parte Enagás, va asumir un 41% del recorte, o 97 millones, frente al 10%, o 23 millones, de los regasificadores, y el 3%, o unos ochos millones, de los almacenamientos soterraños de gas.

   El déficit de tarifa acumuláu, que se produz porque los ingresos destinaos a la parte de peaxes del recibu son inferiores a los costos regulaos, ye frutu de la cayida de la demanda de gas y de la entrada de nueves instalaciones nel sistema.