El Reinu Xuníu reforzó la seguridá nos aeropuertos en respuesta a una alvertencia de los Estaos Xuníos y metanes de tremores pol regresu de yihadistes europeos d’Irak y Siria y el desarrollu d’explosivos más dificilmente detectables. Les autoridaes nun dieron detalles sobre les nueves midíes de seguridá, pero l’indicador del gradu d’amenaza permanecía altu.

El viceprimer ministru Nick Clegg y el ministru de Tresportes, Pwtrick McLoughlin trataron de tranquilizar a la xente, xusto al entamar les vacaciones de branu. El personal de seguridá comentó que taben al corriente del fortalecimientu de la seguridá pero que too trescurría con normalidá.

Un expertu en seguridá aerea, Philip Baum, dixo a la televisión Sky que probablemente se van incrementar los rexistros aleatorios de pasaxeros y que toos va tener que sacase los zapatos p’atravesar los arcos de seguridá.

Les autoridaes estadounidenses dixeron el miércoles que tenía de reforzase la seguridá n’aquellos aeropuertos d’Europa y Oriente Mediu con vuelos directos a los Estaos Xuníos. L’anuncia prodúxose nes víspores del 4 de xunetu, día de la independencia, pero Washington nun quixo precisar si respondíen a una amenaza o plan concretu de cometer un atentáu.

Nos últimos meses, varios expertos contraterroristes estadounidenses explcaron que ye posible que grupos extremistes desarrollaren nueves técniques pa sortear los controles de seguridá.