Según esplica, nos últimos díes, la situación agravóse nel norte del país y mientres Mosul sigue baxo control del ISIS, en Tikrit persisten los combates ente esti grupu y les fuerces gubernamentales.

   Los enfrentamientos armaos repitiéronse n'otres munches zones del país, como Faluya, onde les fuerces del Gobiernu y les facciones insurxentes sunines combaten dende febreru.

   Tres la toma de Mosul pol ISIS, la metá de los sos habitantes fuxó de la ciudá, ente ellos la comunidá de 3.000 cristianos que, na so mayoría, abellúguense nel área de Qaraqosh, cercana a la provincia de Nínive, que cuenta con una importante minoría cristiana de 40.000 persones.

   Pocos díes dempués d'ocupar Mosul, l'ISIS fízose tamién col control de Nínive, dende onde'l pasáu 25 de xunu empezó a bombardiar Qaraqosh y a combatir coles milicies curdes que protexen a la so población. Estos enfrentamientos provocaron centenares de muertos y nuevos desplazamientos de población hacia Erbil, la capital del Kurdistán iraquín, según esplica Cáritas.

   Los cálculos de la organización de la Ilesia n'Iraq apunten a que más de 15.000 families abandonaron les sos cases namás en Qaraqosh. Dalgunes d'elles toparon abellugu en cases de familiares, ilesies y campamentos, onde s'alcuentren viviendo en condiciones bien precaries, mientres otres tán atrapaes nos puntos de control militar d'entrada al Kurdistán.

   Amás, munches carreteres del norte d'Iraq tán cortaes, lo qu'enzanca l'accesu de los desplazaos a Erbil y a otres zones d'esta rexón autónoma, que son les úniques árees segures. Calcúlase que la Rexón Autónoma del Kurdistán acueye esti añu a cerca de mediu millón de refuxaos.