La humanidá, bien mermada tres d’un virus mortal que malapenes dexó supervivientes, enfréntase agora a la primera guerra colos simios, un episodiu espléndidamente narráu na última entrega de la saga “Planeta de los Simios”, que va llegar a les pantalles a mediaos de xuneru.

“Dawn of the planet of the Apes”, producida tres años depués de “Rise of the Planet of the Apes” (L’orixen del planeta de los simios), abunda como la so predecesora nos últimos díes de la civilización de los humanos y l’entamu nos alredores de San Francisco de lo que col tiempu va ser l’imperiu de los simios, forxáu pol pioneru y llíder de los primeros monos intelixentes, Caesar.

“Fue un papel increible d’explotar y desendolcar, porque tenía de facer de Caesar, un simio enforma más parecíu a un humanu na so manera d’actuar. Agora tien muncha responsabilidá como llíder, y la so expresión facial ye de muncho más dolor y preocupación que nel filme anterior”, explica nuna entrevista l’actor que da vida al simiu protagonista, Andy Serkis.

Serkis interpretó los movimientos y expresiones de Caesar mediante la técnica de caprura de movimientos, na que l’actor británicu ye yá tou un expertu. Ente los sos papeles anteriores con esti sistema afáyense papeles tan destacaos como’l de Gollum na triloxía de “El Señor de los Anillos”.