Cola Gioconda nun hai quién pueda. Como l’añu pasáu, en 2013 el Louvre, de París –qu’alluga’l célebre cuadru de Leonardo da Vinci. ye’l muséu más visitáu del mundu. Atravesaron les sos puertes más de nueve millones de persones. El más visitáu y eso que la entrada cuesta ente 12 y 16 €, y amás col númberu de públicu baxando, en 2013 un 4% menor qu’en 2012.

Al Louvre síguelu’l Muséu Nacional d’Hestoria Natural, de Washington, con 8 millones de persones y el Muséu Nacional de Xina, en Pekín, con 7,4 millones. En cuartu llugar ta’l Muséu Nacional del Aire y del Espaciu, tamién en Washington, y el quintu ye’l Muséu Británicu, xoya llondinense nel que, por exemplu, una parte de los frisos del Partenón d’Atenas. Pasaro n per él, en 2013, 6,7 millones de persones, ye dicir, un 20,2 per cientu más qu’un añu enantes. Estos cuatro museos citaos son d’entrada gratuita.

En sextu llugar entra l’elegante Metropolitan de Nueva York, con 6,2 millones de visitantes, y pisándo-y los calcaños La National Gallery de Londres. Los Museos Vaticanos –qu’alluguen un ensinfín de maravíes, ye un percorríu que lleva multitúes tolos díes a la Capilla Sixtina- algamaron los 5,4 millones de persones.

Los siguientes dos, son museos de Ciencies Naturales. El de Londres, con 5,2 millones de visitantes, y l’Americanu, con 5 millones.