Madrid.-El presidente del Congresu, Jesús Posada, almitió esti miércoles que la tramitación del aforamientu del rei Juan Carlos quedó "un poco chambonada" porque les Cortes tuvieron que tramitala "a toa velocidá", pero defendió la concesión d'esti estatus xurídicu al padre del actual Xefe del Estáu y a otros miembros de la Familia Real.
Asina lo aseguró Posada mientres el debate que caltuvo colos alumnos del cursu 'Estáu y sociedad ante crisis y corrupción', entamáu pola Asociación de Periodistes Parlamentarios (APP) nel campus de Vicálvaro (Madrid), de la Universidá Rey Juan Carlos.
Posada reconoció que la reforma pa 'blindar' a Juan Carlos I hbiera que pensala antes y qu'a la fin, poles prieses, incurrióse "nuna chambonada". "Llevemos les coses nel Congresu a toa velocidá; nes formes puen ponese peros, pero no fondero non", añadió.
D'esta forma Posada vien coincidir coles crítiques de la oposición al procedimientu, pues tanto'l PSOE ya IU como UPyD y los nacionalistes quexáronse de la decisión del PP de tramitar d'urxencia l'aforamientu al traviés d'una enmienda introducida l'últimu día de plazu nuna reforma puntual de la Llei Orgánica del Poder Xudicial que taba abierta pero con otros fines.
NUN SE LLIBREN DEL XUICIU
En tou casu, Posada insistió en qu'aforamientu nun ye sinónimu de "impunidá", polo que si dalgún aforáu comete un delitu "van xulgalu igual que'l que nun lo ta". Nesti puntu comentó que si daquién "por enfotu de notoriedá" entama una causa contra Juan Carlos I "ye lóxicu" que puea "cortase de raigañu" pero que, nel casu de ser posible, l'aforamientu "nun-y diba valir pa nada" porque nun lu llibraría del xuiciu.
Amás, Posada esplicó que l'aforáu benefíciase de que lu xulgue'l Supremu, pero que tamién tien que boriar col inconveniente de nun poder recurrir ante esti órganu, una posibilidá que sí tienen los que nun son aforaos y los xulguen nuna primer instancia.
Al respecto de la revisión d'esta figura propuesta pol PP, el presidente del Congresu recordó que reducir el númberu d'aforaos entraña dificultad, polo menos nel ámbitu políticu, porque ye la Constitución la qu'establez l'aforamientu de diputaos y senadores.
