El de Mérida ye’l festival de teatru clásicu más antiguu d’España. La so primer edición cellebróse en 1933 con una versión de “Medea” adaptada por Miguel de Unamuno. Tres de 19 años ensin cellebrase, tornó en 1954. Dende entós consolidóse como la cita cultural más importante del branu. Esti añu, amás, cellebra la so edición númberu 60, y va facelo a partir del 2 de xuneru con montaxe “Salomé”, la ópera de Richard Strauss basada na hestoria bíblica de la decapitación de Xuan el Bautista, llevada nesta oportunidá a escena por Paco Azorín con coreografía de Víctor Ullate y la collaboración de la Orquesta d’Extremadura.

Hasta’l 24 d’agostu, toles artes escéniques van vese rrepresentaes nesta 60 edición: ópera y música –“Salomé”-, danza –“Medusa”, cola compañís de Sara Baras-, circu –“Circus Augustus”- y teatru. La comedia y les composiciones dramátiques y tráxiques de los textos y temátiques grecollatines van vese representaes en nueve grandes títulos, dellos enxamás llevaos a escena. Formen esta programación “La Ilíada”, d’Homero, dos obres d’Aristófanes, “Les ranes” y “Pluto”, “Coroliano”, de William Shakespeare, y “Edipo Rey” y “El eunuco”, de Terencio.

La númberu 60 ye una edición especial del festival que fuera declaráu pola Alministración del Estáu como acontecimientu d’excepcional interés públicu y que coincide amás colos dos mil años de la muerte del fundador de Mérida, l’emperador Ocatvio Augustu. La coincidencia, amás d’hestórica, guarda rellación con un elementu esencial: el Teatru Romanu de Mérida, declaráu Patrimoniu de la Humanidá pola UNESCO en 1993.