La Casona del Bravial de Blimea acueye a partir del día 1 de xunetu una esposición de l’artista blimeína María de los Ángeles Rodríguez García “Geles”. Baxo’l títulu “Pintando una ilusión” espónense una serie de pintures figuratives inspiraes en paisaxes  y elementos de la naturaleza, pa lo que fai usu, principalmente, de la téunica del oleu. 

Geles yá tuvo ocasión d’esponer la so obra dientro del conceyu de Samartín nel añu 2012, na Casa de la Xuventú de Sotrondio, y tamién n’otros puntos de la xeografía peninsular como Porto Cristo o Artà (Mallorca). Collabora cola Asociación Parkinson Asturias, enfermedá que padez  dende fai años, lo que nun ye torga pa desendolcar la so faceta artística y da tovía más méritu al so llabor. Asina, nel añu 2011, cola so obra titulada “Atardecer” algamó’l primer premiu del apartáu de pintura del concursu “Cuentánoslo con Arte” entamáu pola Federación Española de Parkinson (FEP) y la Fundación Medtronic. 

La esposición va poder visitase de llunes a vienres na Casona del Bravial de Blimea n’horariu de 9 a 13 h. durante tol mes de xunetu.