Madrid (E.P.) .-El candidatu a la Secretaría Xeneral del PSOE Pedro Sánchez afirmó esti martes que, nel casu de tornar nel próximu secretariu xeneral del partíu, integraría na nueva dirección a los otros dos aspirantes, Eduardo Madina y José Antonio Pérez Tapias, mientres que si a lo último fuera Madina el más votáu, aceptaría tar con él na Comisión Executiva Federal.

   "Claro que sí", respondió Sánchez nuna entrevista n'Onda Cero, recoyida por Europa Press, cuando-y plantegaron tanto una posibilidá como la otra. L'argumentu que dio ye que nel PSOE "nun sobra naide" y por eso hai qu'evitar "volver cometer los errores del últimu Congresu", el de Sevilla, nel que los socialistes acabaron "dividíos".

   "Creo que lo que yo puea representar nun ye tanto lo que yo personalmente represente, sinón lo que puea representar la mio xeneración y otres munches que tán nel PSOE y que lo que queremos ye garrar el testigu y cambiar les coses dientro del partíu pa cambiar la política y el país", esplicó.

   "Considérome parte d'un equipu y creo nos lideralgos compartíos, non tanto nel debate de los nomes", añadió Sánchez, que dixo confiar en que'l próximu 13 de xunetu va haber una "alta participación" na votación pa escoyer al socesor d'Alfredo Pérez Rubalcaba porque aprecia na militancia "espectación y rixu pa participar" nel procesu.

   En recordando que va pocos años que ta nel mundu de la política y qu'antes foi profesor y "falsu autónomu", cotizando a la Seguridá Social, presentóse como un candidatu que pue "representar humildemente lo que la ciudadanía quier de los políticos". "Sin desmerecer a naide que siguiera una carrera política, toi bien arguyosu de la mio trayectoria", añadió.

   Coles mesmes, espresó la so identificación colos valores ya idees del socialismu y dixo que pretende promover un cambiu nel partíu "dende embaxo, non dirixíu". Nesta llinia, refugó "les etiquetes" que, dende dellos medios de comunicación, podríen tratar de pone-y mientres la campaña.