Pretoria, (Suráfrica), (E. P.).- L'atleta olímpicu sudafricanu Oscar Pistorius, acusáu de disparar y asesinar a la so moza, nun sufría nenguna enfermedá mental que deteriorara la so capacidá de distinguir ente'l bien y el mal nel momentu de matar, según revela un informe psiquiátricu fechu públicu esti llunes.
Pistorius almitió matar a tiros a la so moza, la modelu Reeva Steenkamp, pero caltién que la confundió con un intrusu escondíu nel so bañu.
El xuiciu, qu'empezó en marzu, tomó un descansu d'un mes pa que l'atleta de 27 años se someta a una evaluación mental nel hospital Weskoppies de Pretoria dempués de qu'un psicólogu forense interpuestu pola defensa testificara que Pistorius tenía un trestornu d'ansiedá. La xueza del casu, Thokozile Masipa, indicó que yera importante conocer l'estáu del acusáu nel momentu del crime pa saber si la condición afectaría a la so responsabilidá penal.
"Nel momentu de los presuntos delitos, l'acusáu nun sufría d'un trestornu mental o enfermedá mental qu'afectara a la so capacidá pa estremar ente'l calter lexítimu o por neglixencia de les sos obres", señaló'l fiscal Gerrie Nel, nun informe presentáu a la corte. Tanto Nel como l'abogáu defensor Barry Roux aceptaron les conclusiones d'un grupu de psiquiatres y psicólogos dempués de 30 díes d'evaluación.
