Palma de Mallorca.-  La Fiscalía Anticorrupción recurrió ante l'Audiencia Provincial de Baleares l'autu pol que'l xuez José Castro punxo esti miércoles fin a les pesquises del casu Nóos y acordó caltener la imputación de la infanta Cristina, y fízolo al traviés d'un escritu de 63 páxines, al que tuvo accesu Europa Press, nel que reprocha al maxistráu llevar a cabu una instrucción "a la carta" y practicar investigaciones "contradictories" sobre la hermana del Rei Felipe VI.

   El fiscal Pedro Horrach acudió pasaes les 9.30 hores a los Xulgaos de Vía Alemaia de Palma, onde interpunxo'l so recursu d'apelación, que va elevase al tribunal de la Estaya Segunda de cara a la so resolución. En concreto, Castro dio trés díes a les partes pa que puean recurrir en reforma -ante'l mesmu Xulgáu- la resolución xudicial, y cinco díes pa que puean facelo directamente ante l'Audiencia.

   Nun duru recursu, Horrach critica que'l titular del Xulgáu d'Instrucción númberu 3 ficiera sobre la Infanta "un xuiciu de valor basáu en meres especulaciones: Cristina de Borbón ye culpable, nun se sabe bien de qué, pa de siguío entamar una intensa prospección pa ver si la garren nun renunciu".

   "Cuando'l puertu de destín ta determináu antes d'entamar la investigación, basáu en  meres especulaciones, contamina de manera tala la marcha esploratoria que la torna nun itinerariu inamovible, nel que los parámetros d'imparcialidá, oxetividá y congruencia que han presidir cualquier actuación xudicial queden apartaos", sorraya atayante'l fiscal, contraponiendo estos aspectos a "una instrucción presidida por un credu y non pola sana guía de la duda".

   Nesta mesma llinia, el representante del Ministeriu Públicu acusa a Castru de llanzar "insinuaciones" que considera "un claru esponente de deriva xudicial, consecuencia d'interferencies mediátiques qu'eleven a la categoría de dogma la parodia de funcionarios sometíos al poder gubernamental. Y ello porque, ironiza, "la realidá 'nun viende' y l'adopción de decisiones frutu del simple exerciciu profesional, sin l'aditamentu d'intrigues o maquinaciones ficticies, resulta raro a efectos comerciales".

Foto: Europa Press.