El primer ministru iraquí, Nuri al Maliki, refugó la formación d’un gobiernu de salvación nacional pa intentar da-y una salida al conflictu, comopidieran varios partíos del país y parte de la comunidá internacional.

“Los llamamientos pa formar un gobiernu de salvación nacional son un güelpe escontra la Constitución y un intentu d’eliminar el procesu democráticu”, denunció Al Maliki nel so discursu selmanal televisáu. El responsable xií acusó amás a fuerces polítiques “que se rebelaron escontra la Constitución” de xunise a les fileres del yihadista Estái Islámicu d’Irak y el Llevante (EIIL) y de dar cobertura a la insurxencia suní pa que controle la provincia septientrional de Nínive.

“Metanes de les difíciles circunstancies nun sentimos a los socios políticos falar d’un respaldu al Gobiernu y actúen como si fueran a repartise’l botín”, llamentó Al Maliki. El primer ministru alvirtió de que’l país fai frente a “una feroz amenaza terrorista” que cuenta cola axuda y el respaldu de países vecinos, a los que nun identificó.

Varios partíos políticos iraquís –sunís y xiís- llamaron nos últimos díes a la formación d’un gobiernu de xuntura nacional qu’englobe a les distintes partes y abogaron por estremar ente les demandes llexítimes de los sunís y les acciones del EIIL. Tamién solicitaron un gabinete de xuntanza al secretariu d’Estáu americanu, John Kerry, que visitara Bardá va dos díes.

Munchos piden qu’Al Maliki nun vuelva encabezar un executivu, pesie a que la so coalición Estáu de Derechu ganara les ellecciones parlamentaries d’abril pasáu, anque ensin mayoría suficiente. Ta previsto que’l próximu 1 de xunetu’l Parlamentu irakí elixa al so presidente y posteriormente al xefe de Gobiernu, unos plazos colos qu’Al Maliki se comprometiera.